Komiteti Evropian i Rajoneve u ka kërkuar "të gjitha qeverive lokale dhe rajonale në Bashkimin Evropian që të mbështesin Ukrainën në këto kohë nevoje" dhe ka mbështetur thirrjen e qyteteve ukrainase për "vendosjen e sanksioneve më të ashpra të mundshme ndaj qeverisë së Federatës Ruse".
Deklarata u miratua në prag të një Samiti Evropian të Rajoneve dhe Qyteteve që do të mbledhë së bashku më shumë se 2000 përfaqësues të autoriteteve rajonale dhe lokale, duke filluar nga guvernatorët rajonalë deri te këshilltarët lokalë dhe duke përfshirë 329 anëtarët e Komiteti Evropian i Rajoneve.
Presidentja e Komisionit Evropian, Ursula Von Der Leyen, tha më 1 mars se BE-ja do të sigurojë të paktën 500 milionë euro ndihmë humanitare. Komiteti i Rajoneve e mirëpriti mbështetjen, duke theksuar në të njëjtën kohë rëndësinë e ofrimit të mbështetjes për rajonet e BE-së në kufi me Ukrainën "në mënyrë që të ndihmohen autoritetet për të mirëpritur dhe ndihmuar refugjatët".
Kievi, Kharkhiv dhe Mariupol janë ndër qytetet ukrainase me të cilat ka punuar Komiteti i Rajoneve gjatë viteve. Presidenti i Komitetit Evropian të Rajoneve, Apostolos Tzitzkikostas, foli me kryetarin e bashkisë së Kievit, Vitaly Klitschko, më 24 shkurt, një ditë pasi Rusia nisi pushtimin e saj.
Komiteti Evropian i Rajoneve filloi bashkëpunimin me rajonet dhe qytetet e Ukrainës në vitin 2010, pas krijimit të Partneritetit Lindor nga BE, dhe në vitin 2015, KR krijoi një grup pune për të mbështetur procesin e decentralizimit të Ukrainës. Përpara pushtimit, Komiteti i Rajoneve po mbështeste gjithashtu nismën e BE kundër korrupsionit në Ukrainë, duke zhvilluar partneritete të qyteteve të fokusuara në qeverisjen e mirë.